କଟକର ଦିନ ମଜୁରିଆଙ୍କ ପୁଅ NEETରେ ପ୍ରଥମ ପ୍ରୟାସରେ ସଫଳ ହୋଇ MBBS ପଢ଼ିଲେ
ଦୀପକ ଶିଶୁ ମନ୍ଦିରରେ ପଢ଼ୁଥିବା ବେଳେ ଆର୍ଥିକ ଅନଟନ ଯୋଗୁଁ ଫିସ୍ ମଧ୍ୟ ଦେଇ ପାରୁ ନ ଥିଲେ । ଫଳରେ ଷଷ୍ଠ ଶ୍ରେଣୀରୁ ଶିଶୁ ମନ୍ଦିର ଛାଡ଼ି ସେ ଏକ ସରକାରୀ ବିଦ୍ୟାଳୟରେ ଦଶମ ଶ୍ରେଣୀ ପର୍ଯ୍ୟନ୍ତ ପଢ଼ିଥିଲେ ।
ପିଲା ଦିନରୁ ଦୀପକ ସାମଲଙ୍କ ସ୍ୱପ୍ନ ଥିଲା ଡାକ୍ତର ହେବା ।
କଟକ: ନିଜର କଠିନ ପରିଶ୍ରମ ଓ ଅଧ୍ୟବସାୟ ବଳରେ ଜଣେ ଖଟିଖିଆ ଦିନ ମଜୁରିଆଙ୍କ ପୁଅ ଡାକ୍ତର ହେବାର ନିଜର ସ୍ବପ୍ନକୁ ପୂରା କରିଛନ୍ତି । କଟକ ବାଲିକୁଦା ସାମଲ ସାହି ବାସିନ୍ଦା ଦୀପକ ସାମଲଙ୍କ ଏହି ସଫଳତାକୁ ନେଇ ଏବେ ପୂରା ସହରରେ ଚର୍ଚ୍ଚା ହେଉଛି ।
୧୯ ବର୍ଷୀୟ ଦୀପକ ନିଜର ପ୍ରଥମ ପ୍ରୟାସରେ ନିଟ୍ ପରୀକ୍ଷାରେ କୃତକାର୍ଯ୍ୟ ହୋଇଛନ୍ତି । କିଛି ଦିନ ତଳେ ସେ ଏସ୍.ସି.ବି. ମେଡିକାଲ କଲେଜ ଓ ହସପିଟାଲରେ ଏମ୍.ବି.ବି.ଏସ୍. ପାଠ୍ୟକ୍ରମରେ ନାମ ଲେଖାଇଛନ୍ତି । ଦିନେ ଯେଉଁ ହସପିଟାଲକୁ କେବେ ରୋଗୀ ତ ଆଉ କେବେ ରୋଗୀଙ୍କ ସମ୍ପର୍କୀୟ ହୋଇ ସେ ଯାଉଥିଲେ, ଏବେ ସେଠାରେ ସେ ନିଜେ ଡାକ୍ତରୀ ପାଠ ପଢ଼ିବେ ଓ ପଢ଼ା ସରିଲେ ଡାକ୍ତର ହେବେ ।
ଏହା ବି ପଢ଼ନ୍ତୁ | ‘MLA କିଣିନେଲେ ଶେଷ ହୋଇଯିବନି ତୃଣମୂଳ କଂଗ୍ରେସ’: BJP ଉପରେ ମମତାଙ୍କ ଆକ୍ରମଣ
ନିଜ ବାପା ନବୀନ ସାମଲ ଓ ମା’ ରଞ୍ଜୁଲତାଙ୍କ ସହ ଦୀପକ
‘‘ପିଲା ଦିନରୁ ମୋ’ର ଗୋଟିଏ ସ୍ବପ୍ନ ଥିଲା ଯେ ମୁଁ ଭଲ ପାଠ ପଢ଼ିବି ଓ ମୋ’ ବାପା ମା’ଙ୍କ ନାଁ ରଖିବି । ମୁଁ କେବଳ ସେହି ସ୍ବପ୍ନକୁ ନିଜ ଲକ୍ଷ କରି ପାଠ ପଢ଼ି ଚାଲିଥିଲି । ମୋତେ ଏହା ପୂର୍ବରୁ ନାଇଜରରେ ବି ଆଡମିଶନ୍ ସୁଯୋଗ ମିଳିଥିଲା, କିନ୍ତୁ ଯେହେତୁ ଡାକ୍ତର ହେବାର ମୋ’ର ସ୍ବପ୍ନ ଥିଲା, ମୁଁ ତାକୁ ଛାଡ଼ି ଦେଇଥିଲି ଓ ନିଟ୍ ପରୀକ୍ଷା ପାଇଁ ପ୍ରସ୍ତୁତ ହେଉଥିଲି । ମୋ’ ଜୀବନରେ ଅଭାବ ଅନଟନ ଆସିଛି, କିନ୍ତୁ ତାହା ମୋ’ ପାଠ ପଢ଼ାକୁ ପ୍ରଭାବିତ କରିପାରି ନାହିଁ,’’ କହିଛନ୍ତି ଦୀପକ ସାମଲ ।
ଏହା ବି ପଢ଼ନ୍ତୁ | ଶେଷରେ ରଣବୀର୍ କପୁର୍ କହିଲେ ସେ ଖୁବ୍ ଜଲ୍ଦି ଆଲିଆ ଭଟ୍ଟଙ୍କୁ ବାହା ହେଉଛନ୍ତି
ଦୀପକଙ୍କ ବାପା ନବୀନ ସାମଲ ଜଣେ ଦିନ ମଜୁରିଆ । ଦୁଇ ଝିଅ ଓ ଦୀପକଙ୍କୁ ନେଇ ପାଞ୍ଚ ପ୍ରାଣୀ କୁଟୁମ୍ବ ତାଙ୍କର । ମଜୁରିରୁ ଯେତିକି ଆୟ ହୁଏ ସେଥିରେ ସେ ପୂରା ପରିବାର ଚଳାଇଥାନ୍ତି । ଦୀପକ ପିଲାଟି ଦିନୁ ଭଲ ପାଠ ପଢୁଥିବାରୁ ନବୀନ ନିକଟସ୍ଥ ଏକ ଶିଶୁ ମନ୍ଦିରରେ ତାଙ୍କର ନାମ ଲେଖାଇଥିଲେ । ହେଲେ ଆର୍ଥିକ ଅନଟନ ଏପରି ପରିସ୍ଥିତି ସୃଷ୍ଟି କଲା ଯେ ଶିଶୁ ମନ୍ଦିରର ଫିସ୍ ମଧ୍ୟ ଦେଇ ପାରି ନ ଥିଲେ ସେ । ଫଳରେ ଷଷ୍ଠ ଶ୍ରେଣୀରୁ ତାଙ୍କୁ ଶିଶୁ ମନ୍ଦିର ଛାଡିବାକୁ ପଡ଼ିଥିଲା । ତା’ ପରେ ଦୀପକ ଏକ ସରକାରୀ ବିଦ୍ୟାଳୟରେ ଦଶମ ପର୍ଯ୍ୟନ୍ତ ପାଠ ପଢ଼ିଥିଲେ ।
ଯୁକ୍ତ ଦୁଇ ପାସ କରିବା ପରେ ଦୀପକ ଯୁକ୍ତ ତିନିରେ ନାମ ନ ଲେଖାଇ ସିଧାସଳଖ ଏନଟ୍ରାନ୍ସ ପାଇଁ ପ୍ରସ୍ତୁତି ଆରମ୍ଭ କରିଥିଲେ । ତାଙ୍କୁ ନାଇଜର ମିଳିଥିଲା ସତ, କିନ୍ତୁ ଡାକ୍ତର ହେବା ସ୍ପପ୍ନ ଥିବାରୁ ଗୋଟିଏ ବର୍ଷ ପାଠପଢାକୁ ଡ୍ରପ କରି ନିଟ୍ ପାଇଁ ପ୍ରସ୍ତୁତି କରିଥିଲେ ।
ଏହା ବି ପଢ଼ନ୍ତୁ | ବାବା ଭେଙ୍ଗାଙ୍କ ଭବିଷ୍ୟତ ବାଣୀ: ୨୦୨୧ରେ ବିଶ୍ୱ ପ୍ରଳୟର ସାମନା କରିବ; ଟ୍ରମ୍ପ୍ କାଲ ହୋଇଯିବେ
ଦୀପକଙ୍କ ଏହି ସଫଳତା ପଛରେ ତାଙ୍କ ବାପା ମା'ଙ୍କ ଅକ୍ଲାନ୍ତ ପରିଶ୍ରମ ମଧ୍ୟ ରହିଛି । ସୀମିତ ସମ୍ବଳ ମଧ୍ୟରେ ପୂରା ପରିବାରକୁ ଚଳାଇବାକୁ ପଡୁଥିବାରୁ ପୁଅର ପାଠପଢ଼ା ପାଇଁ ଅନେକ କିଛି ସହିବାକୁ ପଡ଼ିଥିବା କହିଛନ୍ତି ତାଙ୍କ ମା' ।
‘‘ତା ବାପା ଯାହା ରୋଜଗାର କରନ୍ତି ଘର ଖର୍ଚ୍ଚ ପରେ ମୁଁ କିଛିଟା ମୋ ପିଲା ପାଇଁ ରଖେ । ସେ ଯେତେବେଳେ ଯୁଆଡେ ଯାଏ ମୁଁ ତାକୁ ଅତି ବେଶୀରେ କୋଡ଼ିଏ ଟଙ୍କା ହିଁ ଦେଇଥାଏ । ସିଏ ବି ଘରର ଅବସ୍ଥା ଦେଖି କିଛି ମାଗେ ନାହିଁ । ମୋ’ ପୁଅ ଡାକ୍ତରୀ ପାଠ ପଢ଼ିବ ଓ ଡାକ୍ତର ହୋଇ ଲୋକଙ୍କ ସେବା କରିବ, ମୋ’ର ଆଉ କଣ ଦରକାର? ଭାବୁଛି ଆମେ ଯାହା କଷ୍ଟ କରିଥିଲୁ ଭଗବାନ ଆମକୁ ତା’ର ଉପଯୁକ୍ତ ଫଳ ଦେଇଛନ୍ତି,’’ କହିଛନ୍ତି ଦୀପକଙ୍କ ମା' ରଞ୍ଜୁଲତା ସାମଲ ।
