ଓଲିଉଡର ଚୁଲବୁଲି ନାୟିକା ଅର୍ଚ୍ଚିତା ସାହୁଙ୍କୁ ଆଜି ବାହା ହେଉଛନ୍ତି ଅଭିନେତା ସବ୍ୟସାଚୀ ମିଶ୍ର

ଓଲିଉଡ୍ ଅଭିନେତା ସବ୍ୟସାଚୀ ମିଶ୍ର (Sabyasachi Mishra) ସୋମବାର ଦିନ ରାଜସ୍ଥାନର ଏକ ବିଳାସପୂର୍ଣ୍ଣ ରିସର୍ଟରେ ତାଙ୍କ ପରଦାର ପାର୍ଟନର୍ ଅର୍ଚିତା ସାହୁଙ୍କ (Archita Sahu) ସହ ବିବାହ ବନ୍ଧନରେ ବାନ୍ଧିହେଉଛନ୍ତି ।

ସିନେମା ପରଦାରେ ଅନେକ ହିଟ୍ ଫିଲ୍ମ ଦେଇଥିବା ଏହି ଲୋକପ୍ରିୟ ଷ୍ଟାର୍ ଯୋଡ଼ିଙ୍କ ରିଙ୍ଗ୍ ସେରିମନି ରବିବାର ରାତିରେ ଅନୁଷ୍ଠିତ ହୋଇଛି ।

ଦିଲ୍ଲୀ-ଜୟପୁର ରାଜପଥରେ ଥିବା ନେମ୍ରାନା ଫୋର୍ଟ ପ୍ୟାଲେସରେ ପ୍ରାୟ ୫୦ରୁ ୭୦ ଜଣ ଅତିଥିଙ୍କ ଉପସ୍ଥିତିରେ ଏହି ବିବାହ (Sabyasachi Archita wedding) ଅନୁଷ୍ଠିତ ହେବାକୁ ଯାଉଛି ।

ନିଜେ ସବ୍ୟସାଚୀ ଏହି ଖୁସି ଖବର (Sabyasachi Archita marriage) ମିଡି଼ଆ ପ୍ଲାଟଫର୍ମରେ ଶେୟାର୍ କରିଛନ୍ତି । ସେ ଲେଖିଛନ୍ତି, “ପ୍ରଭୁ ଜଗନ୍ନାଥ ଓ ଆମ ପରିବାରର ଆଶୀର୍ବାଦ ସହ ଆମେ ଏଇ ଖବର ବଡ଼ ଖୁସିରେ ଦେଉଛୁ ଯେ ଆମ ବାହାଘର ଆସନ୍ତାକାଲି ହେଉଛି ।”

“ଆପଣମାନେ ସମସ୍ତେ ଆମ ପରିବାରର ଏକ ଅବିଚ୍ଛେଦ୍ୟ ଅଙ୍ଗ । ଆମର ଭଲ ଓ ଖରାପ ସମୟରେ ଆପଣମାନେ ସବୁବେଳେ ଆମକୁ ନିଜ ପ୍ରେମ ଦେଇଛନ୍ତି । ଆମେ ଆମର ନୂଆ ଯାତ୍ରା ଆରମ୍ଭ କରିବା ପାଇଁ ଏହି ଏତେ ବଡ଼ ଦିନରେ ଆପଣଙ୍କୁ କେମିତି ଭୁଲି ପାରିବୁ? ଆମେ ଆପଣଙ୍କ ଶୁଭେଚ୍ଛା ଓ ଆଶୀର୍ବାଦ ଲୋଡ଼ୁଛୁ,’’ ନିଜ ପୋଷ୍ଟରେ ଲେଖିଛନ୍ତି ସବ୍ୟସାଚୀ ।

ଅର୍ଚ୍ଚିତା ଓ ସବ୍ୟସାଚୀ ଓଡ଼ିଆ ସିନେମା ପରଦାର ହିଟ୍ ଯୋଡ଼ିଙ୍କ ମଧ୍ୟରୁ ଅନ୍ୟତମ ।

ଦୁହେଁ ଅନେକ ହିଟ୍ ଫିଲ୍ମ ଦେଇ ଲକ୍ଷ ଲକ୍ଷ ଓଡି଼ଆ ଚଳଚ୍ଚିତ୍ର ପ୍ରେମୀଙ୍କ ମନୋରଞ୍ଜନ କରିଛନ୍ତି ।

ଏହି ସଫଳ ଯୋଡ଼ିଙ୍କ ଫିଲ୍ମଗୁଡ଼ିକ ମଧ୍ୟରେ ଅଛନ୍ତି ‘ପିଲାଟା ବିଗିଡି଼ଗଲା’, ‘ମୁଁ ଏକା ତୁମର’, ‘ମୁଁ ସପନର ସୌଦାଗର’, 'ପାଗଳ କରିଛି ପାଉଞ୍ଜି ତୋ’ର’, ‘କୋଉ ଦୁନିଆ ରୁ ଆସିଲ ବନ୍ଧୁ’, ଓ ‘ତୋ’ର ମୋ’ର ଯୋଡି଼ ସୁନ୍ଦର’ ।

ଏବେ ଅର୍ଚ୍ଚିତା ଓ ସବ୍ୟସାଚୀ ନିଜ ପରଦା ଉପରର ରୋମାନ୍ସକୁ ଏକ ପ୍ରକୃତ ସମ୍ପର୍କରେ ପରିଣତ କରିବାକୁ ଯାଉଛନ୍ତି ।

ସୋସିଆଲ ମିଡି଼ଆରେ ଏହି ଖବର ପ୍ରକାଶ ପାଇବା ପରେ ସେମାନଙ୍କ ପାଖକୁ ପ୍ରଂଶସକଙ୍କ ଶୁଭେଚ୍ଛାର ସୁଅ ସୁଟିଛି ।

ଗତ କିଛି ବର୍ଷ ଧରି ସୋସିଆଲ୍ ମିଡି଼ଆରେ ସବ୍ୟସାଚୀ ଓ ଅର୍ଚ୍ଚିତାଙ୍କ ପରଦା ବାହାରର ସମ୍ପର୍କକୁ ନେଇ ଅନେକ ତଥ୍ୟ ଘୂରିବୁଲୁଥିଲା ।